Online-Bibliothek

Dritte Scene

[48] Marie, gleich darauf Dummbach.

MARIE. Wos er nor im Sinn hot! Es geht doch nix iwwer en Studirte!

DUMMBACH. Mei, is der hessisch Hausfreind noch net do? Es soll gewiß widder so e geistreich Lehrgedicht drin steh. Wann ich nor wißt, wie der Mensch eigentlich haaßt: es is Alles, wos er schreibt, so akkerat, ma mahnt, es mißt's e rechda dorchdriwwener Advekat geschriwwe hawwe, wo viel Zeit zu[48] so Sache hot. Nor varrahde sei Werke einigen Stolz mit Hochmuth un Eidelkeit vamischt.

MARIE. Ich glahb, er is in der Kich abgäwwe worn, ich will emol gucke. Ab.

DUMMBACH. Dapper dich! Sieht ihr nach. Wos steht mer aus! Der Schmidt hengt er doch nooch, ihr Backe sinn net mehr so roth, wie sonst, un sie macht drihwe Aage. No, ich kann's net ennern. Er wehr mer als Schwiejersohn net unrecht gewäse, wann er orndlich gebliwwe wehr, awwer en Werthshauslumb kann ich net brauche, un den gibt er, wann er'sch noch net is, kahn bessere Lehrmaster kennt er net hawwe, als den Flabch, obschon er ziemliche Eisichte in die Bolidik varreth.

MARIE kommt zurück. Ich hab Ihne ihr Zeidunge enuf in Ihne ihr Stubb gedraage.

DUMMBACH. Recht, mei Dochda. Geh emol her un geb mer e Hand. Guck mer emol ufrichtig in's Gesicht: hostde der'n aus dem Sinn geschafft, he?

MARIE lacht. Ja, Vadda, des geht net eso uf der Post.

DUMMBACH. Der muß extrapost aus deim Kopp.

MARIE. Ja, wann er sich nu awwer ennern deht?

DUMMBACH. Des sollt mich wunnern.

MARIE. No, wann er'sch nu awwer doch deht?

DUMMBACH. Do wehr-er als noch net recebirt.

MARIE. Des werd sieh aach noch gäwwe. De Datterich hot er abgedankt.

DUMMBACH. Des sollt mer lieb sei: obwohl's aach heifig vorkimmt, daß mer abgedankte Minister un so Leit widder ervorzickt. Der Schmidt hat awwer demohneracht Viel widder gut zu mache. Ab.