Online-Bibliothek

Prinzessin

[24] Se weer as en Pöppen, so smuck un so kleen,

Se seet mi in Schummern to dröm' oppe Kneen,

Se fat mi de Hand un ik strak ęr Gesicht,

Vertell ik ęr jümmer de ole Geschicht:

»Dar weer en Prinzessin, de seet in en Bur,

Harr Haar as en Gold, un seet jümmer un lur:

Do keem mal en Prinz, un de hal ęr herut,

Un he war de König un se war de Brut.«

Un gau is se wussen, un nu is se grot!

Se sitt mi in Schummern noch still oppen Schot,

Se hollt mi de Hand un ik küss ęr Gesicht,

Vertell ik ęr jümmer de ole Geschicht:

»Dar weer en Prinzessin, de seet bi en Bur,

Harr Haar as en Gold, un seet jümmer un lur;

Do keem mal en Prinz, un de hal ęr herut,

Un ik bün de König un du büst de Brut!«