Online-Bibliothek

Sechster Auftritt.

[51] LIESCHEN allein. Ach! was Unglick iwer Unglick Sie weint. Ach! het mer die Gretche nor gefolgt, so wehr se net eso ins Verderwe gerennt. Der verflucht Offezier! Die Inkwatirung is doch for nix gut als Unglicker anzerichte. Ach Gretche, dein Ripetazion is verlohrn! de krigst mein Lebtag kähn Mann mehr. Ich hab's immer gesagt: so gehts, wann mer so scheene gute Freindinne hot! Es is awwer nie druff gehehrt worn. Do is se immer mit des Meyersch Kathrinche, mit des Schmidte Sannche un mit des Stumplersch Käthche gange. Uff alle Bähl is se erum fachirt, zischem Bockemer un Eschemer Dohr is se an ähm fort erum[51] geloffe, un ich will net druff schwern, daß se net aach emohl hähmlich uff dem Offebecher Maskebahl war. Doher kimmt awwer des Verderwe von de Mädergern! dehte se dehähm bleiwe, un hette e sollid Bekanntschaft, do bliewe se bei Ehrn. – Fortzelaafe mit eme Offezier – es is gar ze arg! – Wann se dann abselut nixnutzig het wärn wolle – so het se doch besser die Galanderi gelernt, odder wehr ins Kohr gange. – Nä! fortzelaafe mit eme Offezier – des is zu doll! Ach! un mein Aagust, der hot sich sein Ahrm verbrennt. Wann ich nor wißt wie's em ging. Er kennt wohl emohl herkomme. – Awwer freilich der Vatter hots net gern. No! in dem Truwel kennt ersch wohl reskirn.