Online-Bibliothek

Erste Scene

[47] Freitag nachher. Stube in Dummbachs.

MARIE allein. Wort, Datterichelche, dich britsche mer! An kahn Bessere hett ich mich net wenne kenne. Der stäckt voller Piff un Flause noch von Gieße her. Wo er nor bleibt! Heit Middaag wolle- se sich schieße: es is dem Kall sei velliger Ernst. »Un wann er mich zammeschießt,« hot er gesogt, »do haw-ichs um dich vadient.« Ja, Kall, mei Vazeihung host-de, dann wann Ahns for sei Geliebte kumbawel is, in de Doht zu renne, do is er werth, daß mer'm vagibt.

Awwer so weit soll's net komme. Ich mehkt nor wisse, wos der Herr Vedda for en Blahn ausgeheckt hat; er sehkt's net, awwer ich setz mei ganz Zudraue uf en, dann er is dem Datterich spinnefeind. Wort, Mepsche, wer zuletzt lacht, lacht am Beste! Mein gute Kall sollst-de mer ungeroppt losse!