Online-Bibliothek

Scene 18.

[274] Dorthee. Madame Hammel.

MADAME HAMMEL. Sie war do?

DORTHEE. Ja, Madam – un ich sagt ihr frei noch, Frenz, wenn' dein Brate, es is gar ze viel Feier in dem Ofe.

MADAME HAMMEL. No Sie! – des glab ich, Sie is aach e perfect Köchin.

DORTHEE. Ich muß es wohl sein. Ach so was derft mer net bassirn. Mer is net immer so glicklich, en Herr un Madam Hammel zur Herrschaft ze hawwe.

MADAME HAMMEL. Ich kann sage, – ich bin die Frenz satt.

DORTHEE. Sie is doch sonst e gut Medche; sie muß Feind im Haus hawwe, dann die sagen er nix gut noch.

MADAME HAMMEL. Bah!

DORTHEE. Vielleicht, daß ihr die Fraa Baier do gleicher Erd net gut is, un die des iwrig Gesinn uffgehetzt hot.

MADAME HAMMEL. Wähs sie dann ebbes von ihr?

DORTHEE. Sehn Se, ich bin kän Zuträgern, un es kimmt mer hart an, von meim Newemensche beeses ze redde, – un dann sinn mer gute Freund zesamme. – Sie is e bissi vergeßlich, des is wohr; no do helf ich er als aus mit Allem, was se vergeßt; awwer, was wohr is, deß muß wohr sein, sie gibt alles pinktlich widder zerick.[274]

MADAME HAMMEL. Sie will er ewens nix nachsage, aach gut. – Awwer Dorthee – was sage dann die annern Leut von er?

DORTHEE. Es thut mer werklich läd, daß ich sage muß, daß mer von er seegt, sie deht sich ewe viel eraus nemme, sie deht zwar kän Kloppheller mache –

MADAME HAMMEL. Was? Kän Kloppheller? am Dinstag erscht hab ich se erwischt. – Hot mer des Weibsbild net vorgerechent, zwä Groscheläbcher, acht Kreuzer?!

DORTHEE. Wie dumm! Fortfahrend. Awwer sie deht als tractirn in ihrer Kich. Die Mähd aus dem Haus, den Mexter; un ihr Mutter deht alle 8 Tag e Dippe mit Schmalz häm nemme. – Awwer, ich glabs net.

MADAME HAMMEL bei Seite. Do erfahr ich scheene Sache.

DORTHEE. Des iwrig – will ich verschweije.

MADAME HAMMEL. Bosse! – als eraus dermit.

DORTHEE. Es häßt aach – daß – daß – der Herr Hammel sie gar net zankt – sonnern sie – sie – sehr angenehm – aartlich – wollt ich sage, tractirn deht, un sie deht sich vor Ihrem Mann so stelle, als wann Sie se gewiß net fortzeschicke gedraute. Ich glab awwer alles net es is Geschwätz.

MADAME HAMMEL. Was? Ich gedraut mich net, se fortzeschicke – alleweil muß se fort! – Morje des Tags! – Sie is bestimmt nix nutz.

DORTHEE. Des hawwe Se net nöthig Madam; ihr Mutter hat er schond en Platz verschafft – un do werd se Ihne uffsage.

MADAME HAMMEL. Aha! Sie denkt mich in Verlegenheit ze bringe! Gott wie schadd is es, daß Sie noch net frei is, Dorthée! – dann Sie scheint mer e ordentlich Weibsbild.

FRENZ kommt mit der Pastete zurück und geht in das Nebenzimmer ab.

DORTHEE. Zu gut gefällt mersch aach net bei der Madam Kratz.[275]

MADAME HAMMEL. Dann is ja unser Sach uff änmol in der Reih – un wanns Ihr recht is, do is der Miethpennig, e preußischer Thaler. Gibt ihr einen Thaler.

DORTHEE nach einigem Sträuben. Es is mer recht angenehm, wann ich bei Ihne eintrete kann, Madam Hammel, awwer sage se um Gotteswille nix der Frenz – net eher als bis ich meiner Madam uffgesagt hab. Mer derf doch ere Herrschaft aach net grad zu – –

MADAME HAMMEL. Des is aach recht, Dorthée. Morje is aach noch Zeit, un zudem brauch ich die Frenz heut noch. Ich hoffe etzt net, Dorthée, daß Se mer, wie mein Frenz, wie die bei mer eingange is, mit ere nußbamerne Komod, von zwä Schreinerschgeselle getrage, angestoche kimmt. Sie werd ihr Kist hawwe.

DORTHEE. Gewiß nix annerschter. Ja, Madam, Sie hawwe recht, es is gar ze arg, wie's alleweil die dienend Klaß treibt, mer sellt sich scheme, daß mer e Dienstbot is; sonst hot mer Gott gedankt, wann mer Jungfer is gehäße worn, un e katunern Kläd uff dem Leib gehatt hot. Jetzt muß es Mamsell un Merino sein.

MADAME HAMMEL. Sonst – muß ich sage – is die Frenz ziemlich nach dem alte Schnitt, sie is doch etzt annerdhalb Jahr bei mer, un geht immer noch mit ähm un demselbe Borsch.