Online-Bibliothek

Zweite Scene

[47] Marie, Fritz Knippelius.

MARIE ihm entgegen eilend. Ach, sinn-Se endlich da, Herr Vedda! Mit Schmerze haw-ich uf Ihne gebaßt!

KNIPPELIUS. Des is e wohr Kreiz mit eich junge Mäderger! Des soll all iwwer Hals un Kopp geh. Ich, als e junger Ehkrippel, sollt mich eigentlich gor net mit so Sache befasse, un wann's mei Bienche wißt, die deht mer die Ohrn voll flenne, odder ich krehkt mei Schlee.

MARIE. No, wie soll's dann jetz gemacht wern?

KNIPPELIUS. Nor Geduld. Zieht einen Brief aus der Tasche. Des is des Recept gäje Pulwer un Blei.

MARIE. Wos steht dann drin?

KNIPPELIUS. Daß die Neigierd e Haaptdugend von de Weibsleit wehr. Den Brief lehje-Se jetz an en Ort, wo er glei gefunne wern muß: des Iwwerig werd sich noochgehends finne.[47]

MARIE. Ach, wos bin ich Ihne so oblischirt!

KNIPPELIUS. No, wos krie ich dann for mei Mih?

MARIE lacht. Ja, wos soll ich Ihne gäwwe? – Ich hab nix.

KNIPPELIUS. Her en Schmatz!

MARIE. Des sag ich awwer dem Bienche!

KNIPPELIUS. Die derf's wisse. Ich wer doch emol mei Bäsje kisse derfe! Küßt sie und will gehen. Adjeh!

MARIE. Sie lahfe ja gor hortig! Sie kenne gewiß net ohne Ihne ihr Frah sei.

KNIPPELIUS. Es is mer verrothe worn, in Gunnernhause wehr e Stemmche Hemmel, stootsmeeßig fett: do will ich noch heit Morjend hih, daß mer se net am Enn so e Dibborjer Judd vorm Maul ewäck schnappt. Jetz nor behutsam! Nix merke gelosse! Bis ich widder kumm em Uhre finf, sitzt der Datterich in Numero Sicher. Gemorje!

MARIE läuft ihm nach. Wahß dann der Kall Ebbes?

KNIPPELIUS. Gott bewohr! Ich how-en nor weiß gemacht, der Datterich ließ-em soge, er sollt sich erscht em vier Uhr an de drei Brunne eifinne, statt- em drei. Weider is nix nehdig. Ab.